Posts
راحوا فين؟
حاجت كتير ضاعوا مني
بحلم في يوم اني الاقيهم
حاجات كانو حتة مني
وعمري ما كنت بخبيهم
باسأل نفسي دايما راحو فين
وقعو مني ولا تاهو وسط زحمة السنين؟
--
راحت فين؟
رعشة اديا اول يوم في الدراسة
وانا لسة عيل شاري اول كراسة
وبكتب على سطر وبسيب سطر
بكتب بالرصاص مش بالحبر
--
راحت فين؟
الجلابية البيضة الصغيرة
متفصلة عليا بالمسطرة
فرحان وانا نازل اجري بيها
بجري علشان الحق الصلاه
--
راحت فين؟
شمعة فانوسي الجديد
دا ماكانش بلاستيك دا كان حديد
اجري بيه انا والعيال
وانا قلبي فرحان ووشي سعيد
--
راحت فين؟
لمة صحابي واحنا صغار
قاعدين نتفرج على القط والفار
كان هما 10 دقايق كارتون
ماهو اصل ماكنش فية سبيس تون
--
راحت فين؟
الضحكة اللي تجلجل جوة قلبي بجد
وانا عمري في يوم مازعلت حد
ولو حد زعلني اسامحة
منا عمري برضة ماشلت يوم من حد
--
راحت فين؟
راحة بالي لاتعبت ولاسهرت ليالي
لاشلت هم الثانوية
ولا هاجيب كام في المية؟
وهدخل انهي كلية؟
دي حاجات ماكانتش في خيالي
--
راحت فين؟
لمعة عنيا و فرحتها
بصوت حبيبتي و ضحكتها
لما بنلعب انا وهي
مع بعض سوا قدام بيتها
--
راحت فين؟
بنت الجيران اللي كانت اجمل من الجمال
اللي حبتني انا دونن عن باقي العيال
بيقولو انها اتجوزت
و اخوها الصغير بكره راح يبقى خال
--
راحت فين؟
كراسة الرسم والالوان
وقلمي الرصاص والمسطرة والاستيكة كمان
كل الحجات دي واكتر راحوا مني
وسابوني كأني كتاب
مش باقي منة غير عنوان!!!
راحوا فين؟؟؟
عمرو خاطر
أكتوبر2008
