بُكره.....

قولي يا شيخ ايوب

الحلم لية سرقوة

والعقل لية بيتوة

وبُكره يا شيخ فين؟

شد بإيدُه الشال

وغطى راسه وقال

بُكره دا يطلع مين؟؟

ما حتى بُكره باعوه

.....

عمرو خاطر

إبريل 2010

تِترات....

افتحي دولاب الاماني
طلعي حلمين مقاسي
قطعي كلام الجرايد
وارمي ورا ضهرك مأسي
لملمي شمس النهار
مرمية بين الكراسي
وان في يوم بعدت عنك
اوعى تفتكري اني ناسي
او تحسي انك وحيدة
دا انتي في عز الغربة ناسي
الحياة فرصة بليدة
والفرح بطبعة عاصي
ضميني ضمة شديدة
والحمي بروحك عضامي
ظبطيلي حروف كلامي
لاجل ما تطلع قصيدة
اضحكي ضحة فريدة
لاجل ما تنور بيوت
اندهي للشمس ندهه
واغزلي الاحلام خيوط
وارفعي صوت الأغاني
يهز بيت العنكبوت
وارسمي صورة جديدة
ضحكتك يبقالها صوت
بعشق النهيات سعيدة
حتى لو فيها موت
واوعدك بكل غالي
اول ما التترات هتنزل
اسمي في اول الأسامي

....

عمرو خاطر

نوفمبر2009

حبس إختياري.....

فتحوا باب زنزانتي

شدوني من ع الخيش

حالوت اني اهرب

من قبضة الشاويش

وقفت قدام القاضي

صرخت من ظُلم حُكمه

لما حَكَم

....

"سيبوه يعيش"

****

عمرو خاطر

نوفمبر 2009

صدقني لما أقولك
ان الفرحة مش لايقة عليك
والبسمةالخايفة
المرسومة على شفافيك
والضحكة التايهة في عنيك
والدمعة المهزومة الحايرة
مع اول فرصة هتهرب
ومتمسحهاش الا اديك
والناس اللي بتبعد عنك
لما انت تقرب
والفشل اللي يقرب منك
لما انت تجرب
والسور العالي الموجود
والسلك اللي حامية متكهرب
والحلم اللي اصبح مفقود
بقى زيه زيك متغرب
ومرار الغربة في وسط الناس
وضريبة الحلم اللي انداس
ولسة بتدفعها لوحدك
وبقاليك حبة انفاس
يدوب تتنفسهم وحدك
وتسلم نفسك وخلاص
وتبيع اللي فاضلك منك
حبة النور اللي ف عنيك
مش قلتلك

الفرحة مش لايقة عليك


عمرو خاطر
أغسطس 2009

زي الموديلز

بصيت لعينك كتير
حاولت أفهمهم
لكني مقدرتش
معرفش ليه
يمكن لكونهم مخنوقين
ورا اللينسيز
نظراتك حادة
يمكن علشان كدة بتحبي تلبسي النضارة

حاوات أعرفك
بس ماعرفتش
لأنك بتعرفي تتبدلي بمهارة
زي الموديلز
والمشاعر لعبتك
راسمة ع الشفايف بسمتك
لكن يا ترى انت سعيدة؟
ويا ترى أنا زي كل الناس
ولا أنا حالة فريدة
جاوبيني
ماظنش إنك تقدري
وازاي عاوزاني أحبك
وانا مش قادر أفهمك
معرفش عنك شيء حقيقي
إلا إسمك
وانتي متعرفيش غير منظري
يا ريت تحاولي تفهميني
يا ريت تحاولي تقَدري
لما أقولك
إنك جميلة
لكن جمال وردة بلاستيك
لون وبس
ملهاش العطر
يمكن في يوم تتغيري
لكني ماعنديش صبر
وبرغم شوقي لحُضنك
إلا إني عارفُه هيخنقني
وأنا سعادتي في الحياة
إني أبقى حُر

يوليو 2009

وسط الزحام

قال البشر ع الزحمة موت

مع إن هي أصل الدفى

قطر الحياة عمال يفوت

والنجم نورة إنطفى

في الزحمة شُفته وسط البشر

هو اللي قلبه في يوم جرحني

وليه أنا لما لمحتة

حسيت احساس غريب بالخوف في بطني

وليه جه في بالي صورة ليا

راحت ملامحي وإنحط شجرة

شجرة تبان جامدة وقوية

لكن الحقيقة الجزع محني

وليه أنا فضلت ساكت

واما نطقت

الصوت جرحني

وأول ماجت عيني في عينه

ماقلتش أنا غير كلمة واحدة

قلت صارحني

بص في عنينه

وصمته دام

وداريت أنا دمعة نزلت قوام

وفجأة اختفى

تاه في الزحام

وسمعت صوته بيقول كلام

من غير ماينطق

إن الحقيقة دايماً بتجرح

والكدب أسلم

دايماً بنهرب من المواجهة

ونعيش بنندم

حسيت بروحي بتروح قوام

وإني بغرق

حسيت بالألم

بس الألم دا شيء جميل

معناه إني لسة عايش

والطريق لسة طويل

والسهم طايش

والسكة صعبة

لكن لسه عندي أمل

ويارب مايخبش ظني

رميت بروحي وسط الزحام

ودبت وسط البشر

وقلبي داب

وشلت صورة ظهرت في ذهني

مكتوب عليها الإنسحاب



عمرو خاطر
يوليو 2009

حلم مناكِف...

في الاودة أنا لوحدي
وفرحي مخاصمني
لكن اه من عندي
بيحارب قوي حزني
وحالف ما يهزمني
سامع من الشباك
صوت الرياح عاصف
لكني مش خايف
واخاف انا من ايه
وانا من زمان شايف
حلمي جوايا بيديني الامان
وعمري ما كنت جبان
وحلمي مش هايف
دا انا حلمي حلم عنيد
حلم كدة مناكف
حلم مش ساهل
يمكن طريقة بعيد
لكنة يستاهل
يستاهل اني أحارب
وابقى كده مناضل
وان ضاعت مني حاجات
أكيد كتير فاضل
ملعون في كل كتاب
يا داء السكات المر
ولو سجنتني الظروف
صوتي هيفضل حر
يعافر حتى الممات
واطرد بيايدي الخوف
وابص انا لقدام
هو بيقتل الاحلام
غير الخرس والذل؟
وان خاصمتك الايام
اوعى تعيش في الضل
احلم ببكره جميل
فيه الشموس بتطل
وترمي نورها الجميل
على الزهور والفل
والحلم يصبح حقيقة
بس انت اوعى تمل
وخبط بايدك ع البيبان
واواعى في لحظة تكل
انقش طموحك ع الحيطان
وباهي بيه الكل
واوعى تخاف من بكره
دا بكره هو الحل
واوعى لنفسك تكره
دا الكره لروحك قتل

عمرو خاطر
2009-04-29

ساعات...

ساعات...
بحس اني قوي
واني هقدر أنتصر
القي حلمي بينطوي
والقى سيفي بينكسر
يصبح فتات
والعمر ويا الذكريات
يلمع في لحظة
ويختفي
والنور يفوت
ساعات
بحس اني هاموت
مش قادر أمشي
باسند بإيدي على جدران البيوت
وأصرخ انا ماسمعش حسي
وادور على اول تابوت
وفية انا راح ارمي نفسي
وأستنى الموت بهدوء
ساعات
بحس اني مش قادر افوق
ومش عارفني
وابص الاقي فرحي فوق
ومش سامعني
وساعات بحس اني بغرق
ولا لاقي للنجاة طوق
ولا حد بيمد إيده يسعادني
ساعات
بحس اني سعيد
والقى حلمي راجع من بعيد
بيقولي أصبر
خليك عنيد
يطلع سراب
زي حبل قديم وداب
من لمسة واحدة ينقطع
وبكلمة واحدة انا بنخدع
والطريق اصبح ضباب
كل ما اجي انوره
يزيد ضلام
و صبح الشروق أوهام
تخاريف
زي إشتياق الحران
لحبه مطر في الصيف
وزي تصريحات الحكومة
"الرغيف أصبح نضيف"
ساعات
بحس اني زي أوراق الخريف
دبلانة
حزنانة
تطير مع نسمة هوا
و تنداس فوق الرصيف
ساعات
بخاف عليا من الجنون
والوحدة صعبة عليا جدا
لكني أرجع أقول ظنون
وأدي الفجر أهو بيدن
يارب ياللي خلقت الكون
إرحمني
أنا ضعيف

عمرو خاطر
إبريل 2009

أول ما أشوفك

اول ما اشوفك هاعرفك

لانك من زمان صورتك جوايا

وحالف قلبي ليخطفك

ورافض يعيش غير وانتي معايا

هاديكي قصة حياتي

تلعبي دور البطولة

وهامسح كل احزاني من قبلك

وهسلم مفاتيحي لقلبك

سمي وانتي بتدخلي جواه

في دخولك انت الاولى

ادخلي وافتحيله حياة

ياما بيبان كتير قبلك كانت مقفولة

خليتي احلامي تقوم و تجري

من بعد ماكانت مشلولة

بحبك حب يعدي حدود العقل

واوعي تفتكري اني هزعل منك

لو يوم حرقتي الأكل

صدقيني هاكله من ايديك واقول

يااااااااااه حلو بشكل

وبليل هاخدك في حضني

ونتفرج على فيلم رومانسي

وسحرك من الفيلم ياخدني

والاقيكي بتسمعي همسي

بحبك و نفسي أكبر معاكي

نفسي أعجز وانا جنبك

نفسي اعيش عمري وياكي

ولو كنت سعيد الحظ

نفسي اموت وانا جوه حضنك

نفسي عمر مايبقى فيه تاني بعد

ماشيين نتعكز على بعض

وعايشين حياتنا ع القد

ولا يقدر يفرقنا حد

ايدي ماسكة وبتحضن ايدك

عاشقك حتى بتجاعيدك

لو مر الف زمان وزمان

حبك في قلبي زي ماكان

وعلى قد ماقدر هاحسسك بالامان

واصحى من النوم وانت جنبي

واسألك فين طقم السنان؟

تبتسمي وتقوليلي ماكان مانت سايبة

سلامتك من النساين

وتضحكيلي ضحكتك اللي بتحضني

وتشكيلي من دوشة الجيران

واقعد أغنيلك :"عارفة؟*"

وبرغم اني صوتي وحش

تترجيني وتقولي كمان

اقولك خلاص مش قادر صوتي راح

تضحكي ضحكتك

ضحكة تخلي الضيق براح

ضحكة تديني الحنان

وتخلي آلام المفاصل

تروح من غير دهان

وتخلي طيور الفرحة

تقتل خفافيش الاحزان

وترجعلي الامل في النهاردة


--
مقدرش اقولك دلوقتي غير حاجة واحدة

ان حلمي اني الاقيكي

بيهون مرة الوحدة



مارس 2009

* عارفة اغنية لعلي الحجار

ماخبيش عليك

معرفش مالي
تايه سؤالي
وزايد الحنين
مقلوبة قدامي الموازين
انا فين؟
والسؤال الاهم
انا مين؟
الإسم والعنوان اهم
مظبوطين
اومال اللي في الصورة ده
يبقى مين
وليه هو بيضحك
مع ان شكله حزين
وليه غيرته الايام والشهور والسنين

مش دي بطاقتي
دي اكيد متزورة
ودي مش صورتي
دي أكيد متحورة
متركبة

جبت البوم صوري
من بين حاجات متكركبة
طلعت صورتي وانا عندي سنة
أول مرة احس في صورة
إن دا أنا
ياااااااااااااه يا أنا
وحشتني قوي
ووحشتن عنيك الطيبين
الفراحانين
من غير تكلف او خداع
و قلبك الأخضر اللي عمره في يوم ما باع
اللي عمره ما كان حزين
وعنيك اللي كانو شباكين مفتحوين
منورين
بيطلوا ع القلب الأبيض والبرائه
ورغم انك لسة ماتعرفش الكلام
ضحكتك بتحكي بطلاقة

وحشتني انت قبل ما تغيرك السنين
وتسيب فيك طعم الألم
وتعرفك معنى الندم
وتدوقك مر الضنا
والله يا أنا
ماخبيش عليك
الحالة مش ولا بد
وحزني فاق الحد
ومش قادر احكي لحد
أحسن يبيعني في يوم
انا ناسي طعم النوم
بنام كدة تخاطيف
ومش فارقة معايا الفصول
ربيع زي الخريف
وقلبي محتاج قوي لتنضيف

عارف يا انا
كل ما اقول راح ارجع
والحزن خلاص هاودع
القى عيوني تدمع
وجرح جديد بيطلع
مع ان جرحي القديم
لسة يا أنا بيوجع

عارف اية كمان
انا بكره الزمان
وبلعن الأحزان
ولسة بدور عليا
وسط ناس تايهين
والفرحة متدارية
ولا داري طريقها فين

اه ه ه ه
محبوسه بقالها كتير
وخلاص تعبت م المشاوير
وكل ما قول مش قادر
القى اللي باقي كتير

عندي ليك مليون سؤال
ليه الفرح صبح محال؟
وفين هي راحة البال؟
والدنيا ليه كل يوم ف حال؟
وليه لازم مليون قلم
علشان افوق؟
ليه م العذاب و م الألم
لازم ادوق؟
ليه فية مليون غروب
ومفيش شروق؟
ماتجاوبش
انا مش مستني الإجابه
انا بس بفضفض معاك
لحد ماقلبي حد يدق بابه
يمكن يفوق
ويخرج بقى من اكتئابه
ويدوق بقى طعم الهنا

سؤال اخير
وسخيف كالعادة
ليه يا انا
لما كان عندك سنة
ما دعتش ربنا
انا لما تكبر
وهموم القلب تكتر
انه يسيبك ف السعادة؟
عمرو خاطر
فبراير 2009

عتاب

بغرق قدامك
مدي ايدك طلعيني
عاشق ايامك
طب ليه مصرة تكرهيني
مش فارق معاكي
وانا بتنفس هواكي
ومش عاوز سواكي
وعيونك مفارقاني
لابساني احزاني
والاغاني ماتت جوايا
ماتت على لساني
مشيت في عشقي وياكي
لأخر السكة
وعشت بتمانكي
ومستني لصوتك الضحكة
ودموعي عندك مش فارقه
واخد على خاطري منك؟ اه
بكرهك؟ لا
اسمك في دمي بيجري
مع كل دقه
وبرغم طول ليلك
لسه بحلم بالنهار
وحلمي ببنيه تاني
كل مالقاه بينهار
كل اللي عاوزه منك
تخبيني جوه حضنك
وكلمه اسمعها منك
انك صحيح بتحبيني
يا مصر عمري ما اسيبك
حتى لو انتي سبتيني
--
عمرو خاطر
فبراير 2009

حلم

وقفت قدام المراية
قلت اجرب ابتسم
نفسي اخلي مرة تانية
الفرح ف الملامح يترسم
نفسي اضحك لو لثانية
نفسي جرحي يلتئم
حاولت
لكن مقدرتش
جوايا مشاعر
لكن وشي مابيترجمش
حاولت تاني وتالت
وكل مره القى دمعه مني سالت
حتى لما حاولت اداريها
مقدرتش
قلبي قالي ماتحاولش
الفرح قتلته بايدك من سنين
مات تحت جبل من الحزن الدفين
انت اللي كبرته من زمان
وانت اللي اديت ليه الامان
دلوقتي مش هتعرف تبتسم
لأنك مش هتقدر تتقسم
انت واحد مش اتنين
ولأنك مش بوشين
يا تكون سعيد
يا تكون حزين
هما دول الاختيارين
لكن للأسف
مبقاش في ايدك الاختيار
ومبقاش ينفع تغير المسار
ولأنك في الفرح
زي التلميذ البليد
طلع لحزنك طرح
هم وألم شديد
كنت فاكر هتفضل مخبيهم
لحد امتى؟
ودا ذنب غيرك
ولا ذنبك انت
سلمت نفسك للأحزان تملكها
وافراحك خلاص رميتها
نسيتها
او تقدر تقول اتناستها
وادي النتيجة
وادي النهاية واللي كان
وعمرك في يوم ماهتقدر ترجع بالزمان
ضيعت بأديك السعادة
اشرب بقى الاحزان
وكل ماتقول كفاية
راح تزيد كمان و كمان
--
صحيت مفزوع
كان حلم فظيع
جريت ع المراية وابتسمت
لقيت البسمة على وشي اترسمت
الله على الحياة
ويخرب بيت دا حلم
وبرغم أي اه
لسة بعرف ابتسم
عمرو خاطر
فبراير 2009

العاشرة مساءً

بصي يا استاذة منى
اولاً بشكرك اني هنا
وانا واعوذ بالله من دي الكلمة
طيب قوي
اه والنعمة
وكمان بسيط
تقدري تقولي عبيط
مشاعري محتاجة تظبيط
وقلبي محتاج تربيط
ويرجع تاني كأنه جديد
ومش بعيد
يرجع سعيد
ويفرح زي العيال
مهو أصل مفيش محال
دا اجدادنا حفروا القنال
والسعادة مش بالمال
ولا بالجواز ولا بالعيال
السعادة بالرضا
والإيمان بالقدر والقضا
بضمير مرتاح
وابتسامة توصل الفضا
اية؟
معانا مداخلة من قلبي
وماله هرد عليه
بيسأل امتى هتعرف تخبي؟
دا مش زنبي
انا طول عمري كده
اللي جوايا على طول بيبان
انا كتاب بيبان من العنوان
نفسه يحس بالأمان
عيبك يا قلبي
انك حساس
بس متقلقش
لسة في امل في الناس
وانا مش أناني
بحب اشارك الكون
أفراحي وأحزاني
اوعى تبطل تحلم
وكل ما تقع راح تتعلم
وعلشان توصل
لازم تتعب
وعلشان توصل
لازم تتألم
ولازم تفضل تحاول
واوعى تكون تحصيل حاصل
اوك
مفيش مشكلة
نكمل بعد الفاصل
....
عمرو خاطر
فبراير 2009

قصيدة الشجب

قصيدة الشجب
ندين ونشجب ونستنكر
لكن نعمل حاجة او نحارب؟
هو دا المنكر
هات كاسك يا صاحبي
وقوم بينا نسكر
وسيب فاسك يافلاح
ودمر مكنتك يا عامل
مفيش بكره علشانه نعمر
الطوبه في ايد الطفل يحارب بيها العسكر
واحنا اخرنا نمصمص شفايفنا
ونتصعب على المنظر
وحكامنا نايمين على الريش وبتحزر
من ان الوضع اصبح خطير جداً ومستنكر
وصحيح الوضع خطير
لكن قطع الماعونة عندهم أخطر
افهم بقى وقدر
عندنا فدادين شجب واستنكار متعدش
دا عدونا هو حبيبهم اسمع بقى وطنش
ايه يعني بنصدرلهم غازنا
يا عزيزي ((بيزنس از بيزنس))
وايه يعني هما بيقتلوا اخواتنا
محنا اهو في بعضنا بننهش
ولسه بتحلم ببكره جميل
انت ايه ما بتملش؟!!
اسكت بقى واتلهي
وشوف هتاكل منين
وان لقيت رغيفين
افرح بقى وفرفش
صوتنا جهوري
وحنجره قوية
لكن قلوب من حجر
وضمايرنا منسيه
بنبيع ونخدع بعضنا
في الرايحة والجايه
قوم واقعد ع السرير
وافرد ضهرك ومدد
اشجب واحزن وغير
وعلى قد ما تقدر ندد
وبعدها ناملك قرنين
عقبال ما نتوحد
ولا اقولك
شد الغطى على وشك
واذكر ربنا واتشهد
وسيب لهم الكون بما فيه
وارحل بقى وابعد
ماخلاص يا صاحبي
مضى زمن الانبيا
ورجعت الكفار
وناس في توب الاوليا
لكن لابسهم عار
...
عمرو خاطر
يناير 2009

علمتيني..

علمتيني

...
علمتيني حاجات كتيرة
أولهم انك مش أميرة
واني عمري ما كنت فارس
علمتيني حاجات خطيرة
لا يمكن اتعلمها في مدارس
ان قلبي عمره ما كان له حارس
وان الحب دا اوس الكوارث
علمتيني
ادوس على قلبي
ومهما كان جوايا أخبي
وان حبك كان هو ذنبي
والذنب دا لا يغتفر
علمتيني
اكره الليل والقمر
واسب والعن في البشر
واشكي حالي للقدر
وابكي وانا ماشي في المطر
علشان اخبي دموعي عنك
علمتيني
اكون طموح
باني اعشق الجروح
وبدل ما انط من البلكونه
ارمي نفسي م السطوح
علمتيني
مافيش سماح
قلبي كان وايايا راح
وان الحب دا كان حرب
فيها كل شيء مباح
علمتيني
اكره غنايا
اقتل صوتي من جوايا
واكره طيري اللي ف سمايا
واخنق قلبي بين ضلوعي
علمتيني
اخرس دموعي
واطفي بدمي شموعي
علمتيني
ان اللي يوفي
هو اللي ف الاخر بيبكي
ولا حد يسمعه لما يشكي
بس عارفه
عمري ما هبقى حد تاني
هفضل زي ما انا
بدموعي بجرحي بأحزاني
وعمري ما هبطل اماني
وصوتي هايعلى بالأغاني
وهقف على رجلي تاني
والملم نفسي واداوي جراحي
واني برغم توهتي صاحي
وعمري ماهسلم سلاحي
او هدمر يوم مدينتي
وانت خليكي زي مانتي
لحد ماتموتي عانس
مسيري هالقى في يوم أميرتي
ومسيري يوم راح ابقى فارس

...
عمرو خاطر يناير 2009

طريق

طريق
انا قلبي طريق
كان في الاول اتجاه واحد
اي يحد يدخل
كان يفضل قاعد
مهما يجرح او يخون
يفضل قاعد في برود, في سكون
لكن لا!
ان لازم اخليه اتجاهين
وياريت كل اللي جرحوني
او خانوني
يلزموا الجانب اليمين
هتلاقوا منحنى
وفتحة مكتوب عليها خروج
ياريت تخرجوا وانتوا ساكتين!
عمرو خاطر
ديسمبر 2008

الدمعة محبوسه

الدمعه محبوسه

بتداري طيبه قلبك

ورا قساوة وش

بقيت خايف تضحك

احسن تكون بتغش

بتغش قلب حزين

ورا ابتاسمة دبلانه

بتغش دمعه في عينك

واقفه حيرانه

بتغش غنوه في صوتك

بس سكتانه

عشت عمرك كله تحلم بحضن

حضن واحد!

مش مهم مين يحضنك

المهم انه ينسيك الحزن

حد ترمي وشك جوه سدره وتبكي

حد تفتحله قلبك وعن همومك تحكي

لما تصرخ يصرخ فيك

يهديك

يداوي جراحك

يعيد افراحك.

يطبطب على كتفك

ويقولك بكره جاي النهار

خايف لما تموت يقسموك اتنين

قلبك يخش الجنة

وانت تخش النار

عشت عمرك كله

خايف تاخد قرار

حتى حب حياتك الوحيد

كان حب كدة

من بعيد لبعيد

سيبتة يضيع!

فضلت واقف محتار

عشت تحلم بلحظة الاختيار

ولما جاتلك الفرصة

خفت

هربت

وسبت كل شئ ينهار

وبرضة ماخدتش قرار

ماشي في وسط الناس

لكن جواك وحيد

جواك عنيد

بتشكي من الاحساس

كان نفسك تكون حديد

دا حتى الحديد بيلين

الا البني ادمين

سواء عايشين او ميتين

مات الخير جواهم

الشر جه وملاهم

وصبح الكتير شياطين

والطيب في الزمن دا انقرض

مع ان الاصل فينا الخير

دا المفترض!

لكن هاتقول لمين؟

نفسك تصرخ

لكن صوتك مكبوت

وشك شكله بيبكي

لكن مش طالع لك صوت

معرفش دايماً ليه بتفكر في الموت؟

والدمعه محبوسه

مش عارفه هتروح فين

لا راضيه تفارقك وتنزل

ولا راضيه تخش العين

بتسأل روحك دايما نفس السؤال

ياترى في يوم هتفرح؟

ولا دا شئ محال؟

هتلاقي قلب جنبك؟

ولا دا في الخيال؟

هتحب يوم وتفرح

وتتجوز وتجيب عيال؟

ولا هتموت لوحدك؟

ولاحد هيدرى بيك

تفتكر في حد ممكن في يوم يزعل عليك؟

تفتكر في يوم هتلقى قلب يحس بيك؟

و لا هتيجي ناس

وتنزل دمعتين

ويشاورا على قبرك

ويقولوا يا حرام مسكين

عاش العمر كله وهو حزين

وبرضه يوم ما مات

مات وحيد

مات حزين

 

عمرو خاطر

نوفمبر 2008