Posts
ساعات...
بحس اني قوي
واني هقدر أنتصر
القي حلمي بينطوي
والقى سيفي بينكسر
يصبح فتات
والعمر ويا الذكريات
يلمع في لحظة
ويختفي
والنور يفوت
ساعات
بحس اني هاموت
مش قادر أمشي
باسند بإيدي على جدران البيوت
وأصرخ انا ماسمعش حسي
وادور على اول تابوت
وفية انا راح ارمي نفسي
وأستنى الموت بهدوء
ساعات
بحس اني مش قادر افوق
ومش عارفني
وابص الاقي فرحي فوق
ومش سامعني
وساعات بحس اني بغرق
ولا لاقي للنجاة طوق
ولا حد بيمد إيده يسعادني
ساعات
بحس اني سعيد
والقى حلمي راجع من بعيد
بيقولي أصبر
خليك عنيد
يطلع سراب
زي حبل قديم وداب
من لمسة واحدة ينقطع
وبكلمة واحدة انا بنخدع
والطريق اصبح ضباب
كل ما اجي انوره
يزيد ضلام
و صبح الشروق أوهام
تخاريف
زي إشتياق الحران
لحبه مطر في الصيف
وزي تصريحات الحكومة
"الرغيف أصبح نضيف"
ساعات
بحس اني زي أوراق الخريف
دبلانة
حزنانة
تطير مع نسمة هوا
و تنداس فوق الرصيف
ساعات
بخاف عليا من الجنون
والوحدة صعبة عليا جدا
لكني أرجع أقول ظنون
وأدي الفجر أهو بيدن
يارب ياللي خلقت الكون
إرحمني
أنا ضعيف
عمرو خاطر
إبريل 2009
Wednesday, April 22, 2009
ساعات...
Subscribe to:
Post Comments (Atom)
No comments:
Post a Comment