Posts
الدمعه محبوسه
بتداري طيبه قلبك
ورا قساوة وش
بقيت خايف تضحك
احسن تكون بتغش
بتغش قلب حزين
ورا ابتاسمة دبلانه
بتغش دمعه في عينك
واقفه حيرانه
بتغش غنوه في صوتك
بس سكتانه
عشت عمرك كله تحلم بحضن
حضن واحد!
مش مهم مين يحضنك
المهم انه ينسيك الحزن
حد ترمي وشك جوه سدره وتبكي
حد تفتحله قلبك وعن همومك تحكي
لما تصرخ يصرخ فيك
يهديك
يداوي جراحك
يعيد افراحك.
يطبطب على كتفك
ويقولك بكره جاي النهار
خايف لما تموت يقسموك اتنين
قلبك يخش الجنة
وانت تخش النار
عشت عمرك كله
خايف تاخد قرار
حتى حب حياتك الوحيد
كان حب كدة
من بعيد لبعيد
سيبتة يضيع!
فضلت واقف محتار
عشت تحلم بلحظة الاختيار
ولما جاتلك الفرصة
خفت
هربت
وسبت كل شئ ينهار
وبرضة ماخدتش قرار
ماشي في وسط الناس
لكن جواك وحيد
جواك عنيد
بتشكي من الاحساس
كان نفسك تكون حديد
دا حتى الحديد بيلين
الا البني ادمين
سواء عايشين او ميتين
مات الخير جواهم
الشر جه وملاهم
وصبح الكتير شياطين
والطيب في الزمن دا انقرض
مع ان الاصل فينا الخير
دا المفترض!
لكن هاتقول لمين؟
نفسك تصرخ
لكن صوتك مكبوت
وشك شكله بيبكي
لكن مش طالع لك صوت
معرفش دايماً ليه بتفكر في الموت؟
والدمعه محبوسه
مش عارفه هتروح فين
لا راضيه تفارقك وتنزل
ولا راضيه تخش العين
بتسأل روحك دايما نفس السؤال
ياترى في يوم هتفرح؟
ولا دا شئ محال؟
هتلاقي قلب جنبك؟
ولا دا في الخيال؟
هتحب يوم وتفرح
وتتجوز وتجيب عيال؟
ولا هتموت لوحدك؟
ولاحد هيدرى بيك
تفتكر في حد ممكن في يوم يزعل عليك؟
تفتكر في يوم هتلقى قلب يحس بيك؟
و لا هتيجي ناس
وتنزل دمعتين
ويشاورا على قبرك
ويقولوا يا حرام مسكين
عاش العمر كله وهو حزين
وبرضه يوم ما مات
مات وحيد
مات حزين
عمرو خاطر
نوفمبر 2008
1 comment:
ارغى براحتى بقا هنا
هناك بحس زى ما يكون حد بيعد عليا الحروف
الكلمتين دول جامدين "خايف لما تموت يقسموك اتنين قلبك يخش الجنة وانت تخش النار "
كمان عجبتنى اما قلت عشت تحلم بلحظة الاختيار..... وبرده ماخدتش قرار
صحيح المعنى غرقان بالسلبية بس حلو او واقعى او مش عارفة ليه عجبنى
وقفت كتير عند يوم ما مات مات وحيد مات حزين معرفش ليه
بس مجملا
شاعر مرهف الاحساس
Post a Comment