Posts
******
في عز الحيرة جوايا
في حته صدق بقيالي
ورغم الوحدة أنا ونسان
ولسه الحزن ويايا
لكني برضه مش خايف
منا إنسان
وحزني هو راسمالي
سنين عدت على قلبي
واحلام كتير ماتت
وبواقي ضِحكة باقيالي
وباقي اسمي من العنوان
مهي الدنيا ماهيش لعبة
ولا حكاية وكان ياما كان
ولا حدوته منسية
بطلها يبقى في الاخر
ملك سلطان
يموت الشر من نظره
وست الحسن تلقاها بتتجوز
فقير غلبان
الدنيا يا صاحبي قشاية
بتهرب من ايدين غرقان
والفرحه مركبه تايهة
مابين شطئان
والحب عُمره ماكان كتاب مفتوح
بيبان في قهوة الفنجان
والحلم زيه زي الموج
في لحظه يروح
والضحكة المحبوسة في شفايفك
حلاوة روح
ثواني وتبقى في الذكرى
مع النسيان
مع لمعه عنين راحت
وعُمر بيجري قدامك
وايامك خلاص شاخت
وقلبك صبح دبلان
ويوم ماحاولت تتكلم
طلع الكلام كلام ساكت
كلام هذيان
.......
عمرو خاطر
أكتوبر2010
قبل ساعات من تسليم نفسه لمركز التدريب لينضم الى القوات المسلحة المصرية لمدة عام
:D
No comments:
Post a Comment